Atualità
Strada dla Val Badia, incrujada nöia por Mantëna todëscia
La Junta provinziala á aprové les carateristiches tecniches dl’incrujada nöia por Mantëna todëscia. Al gnará mioré la sigurté sön la strada dla Val Badia.
La strada statala dla Val Badia, tla vijinanza dla incrujada por Mantëna todëscia y pro l’azes ala zona produtiva “Baumüller Boden”, é scialdi prigorosa ince porvia dla gran velozité di veicui che passa y por na visibilité nia otimala. Ince deache al é na trata rodunta él tröc ciafers che adora chësta trata por sorpassé, ince sce al é proibí dal Codesc dla Strada y le limit de velozité é de 70 chilometri al’ora. “Deache i orun smendrí les situaziuns de prigo un tut la dezijiun da intergní cun operes stradales por smendrí la pericolosité dla trata y por mioré la sigurté stradala”, spliga l’assessur Florian Mussner.
Sön proposta de Mussner á la Junta provinziala aprové les carateristiches tecniches de n intervënt dopl por n investimënt complessif de zirca 900.000 euro. Sides pro la incrujada por Mantëna todëscia co ince pro l’entrada tla zona produtiva gnarál fat intervënc de spartiziun dla strada, cun chi che al sará imposcibl da sorpassé te chë trata. L’intervënt prevëiga ince le spostamënt dla strada tl vers dla Gadera, sciöche ince le spostamënt dles döes architades dles corieres, por chëres che al é ince preodü n marciapisc y n’area de sosta por i passajiers.
USP
