Atualità
Les dezijiuns plü importantes dala Junta provinziala
Proporz, investimënc tl Palaz dla Iustizia, apoteches nöies, reorganisaziun dla Direziun istruziun y formaziun taliana: chëstes é les dezijiuns dla Junta.
Tl Palaz dla Iustizia a Balsan él debojëgn de laurs de manutenziun y de restrotoraziun. La Junta provinziala á aprové incö ai 10 de lugio sön proposta dl assessur Christian Tommasini n program de intervënc por indöt 10 miliuns de euro. Al é preodü laurs de ressanamënt dla pert dancá y dla curt interna. Al é ince sön le program da fá danü l’implant eletrich, l’implant termo-idraulich y le sistem informatif. Implü él ince preodü mosöres por ci che reverda la segurëza y la proteziun cuntra le medefüch. “Por fá funzioné bun la iustizia él ince nezesciar da avëi strotöres adatades y porchël él la Provinzia che investësc te chësc setur”, á doligné le vizepresidënt dla Junta Christian Tommasini. Le passaje dl frabicat dla Signoria da Balsan é passé tl dezëmber dl 2017 dal Stat ala Provinzia y al á n valur stimé de 40 miliuns de euro. Cun la norma d’atuaziun numer 16 de forá dl 2017 él le Stat che á atribuí ala Regiun Trentin-Südtirol y ales Provinzies de Trënt y Balsan la competënza tl setur dl’aministraziun iudiziaria.
La Junta provinziala á incö ai 10 de lugio tut la dezijiun da fá recurs cuntra la sentënza cun chëra che la Signora de Balsan reconësc a n’aziënda privata le dërt da ne apliché nia le proporz etnich tl setur dl trasport feroviar publich. La materia dl proporz é, sciöche le bi- y trilinguism, na fondamënta prinzipala dl’autonomia. Por chësta rajun - insciö la Junta - mëss le proporz gní garantí te sorvisc publics te vigni setur, ince chi che vëgn manajá da privac. La Junta provinziala á insciö tut la dezijiun da fá recurs dan la Curt d’Apel. La chestiun reverda na dezijiun tuta dal conzescionar SAD por n post scrit fora tl merz 2017.
La Junta provinziala á incö ince dé so bëgnester ala prozedöra de reorganisaziun dla Direziun istruziun y formaziun taliana. “Al é na prozedöra che avaliëia la strotöra tla scora taliana ala situaziun todëscia cun la renunzia ala separaziun di rodi danter diretur de departimënt y intendënt che te nosc caje ess podü porté a confujiun di rodi”, á splighé l’assessur por la scora taliana Christian Tommasini. La novité plü importanta é la creaziun de na repartiziun nöia dal inom “Inovaziun y inrescida pedagogica”. Chësta istituziun nöia dess ince renforzé la colaboraziun cun la Univeristé da Balsan.
La Junta provinziala á ince assegné incö 4 dles 9 sëntes de apoteches nöies metüdes a concurs por le secundo iade. Sön proposta dl assessuria por la sanité Martha Stocker él gnü assegné döes apoteches a Balsan (Piani y via Druso), a Lana y Astfeld tla Val de Sarnthein.
USP
