Atualità

Prestaziuns sanitares spezialistiches: Straufunga sce nia desdites

Paziënc, che á prenoté prestaziuns spezialistiches tl setur sanitar, che se ne presentëia nia y ne desdij nia la vijita, messará paié na straufunga de 35 euro.

Chi che prenotëia na vijita sanitara spezialistica y che ne ó nia plü la tó en conscidraziun á l’oblianza da la desdí. Chi che ne se tëgn nia a chësta regola, messará tl dagní paié na straufunga d’aministraziun de 35 euro. Chësc vel ince por paziënc che ne mëss nia paié la cuota de partezipaziun. Chësta dezijiun é gnüda tuta incö ai 3 de lugio dala Junta provinziala sön proposta dl’assessuria por la sanité Martha Stocker. L’Aziënda sanitara metará en pratica la norma 60 dis do la publicaziun dla prozedöra. ”Cun chësta mosöra orunse sensibilisé i paziënc da adoré te na manira responsabla les ressurses publiches. Insciö podessel ince gní smendrí i tëmps da aspeté tla sanité”, á dit l’assessuria por la sanité.

La Junta provinziala á ince stabilí na seria de rajuns che vel sciöche desdita regolara. Al se trata de na permanënza tl ospedal dl interessé o de familiars, problems de sanité, la nasciüda de n möt/na möta, n caje de mort, n inzidënt söl laur o sön strada. Te chisc caji mëss le paziënt documenté la gauja de mancianza de presënza ala vijita y ne messará nia paié la straufunga. L’Aziënda sanitara presentará tosc la mosöra cun düc i detais.

USP