Atualità

Daurides de domënia, Kompatscher ti scrí a Di Maio

Les detlaraziuns dl minister Di Maio sön les botëghes davertes de domënia y ti dis de festa mët indô sön mësa le tema. Lëtra de Kompatscher al minister.

Regolé i orars de daurida dles botëghes, garantí le dërt de palsa de domënia y ti santus, sostigní na majera orenté dles families da cumpré ite tl tëmp lëde. Chësc é le travert che la Provinzia de Balsan se tol dant por ci che reverda l'orar de daurida di eserzizi comerziai, argomënt indô d'atualité do les detlaraziuns dl minister dl laur y dl svilup economich, Luigi Di Maio. Avisa le minister nü é le destinatar de na lëtra ortiada ti ultimi dis dal presidënt dla Provinzia, Arno Kompatscher, olache al ne se limitëia nia ma a porté dant süa sodesfaziun por "les detlaraziuns che reverda le bojëgn da ciaré jö danü les desposiziuns". Tla lëtra recorda Kompatscher che "cina al’aprovaziun dl decret Monti á la Provinzia eserzité les competënzes legislatives en materia, dagnora cun le fin da colié na dërta liberté d’impresa cun la sconanza fondamentala sozio-culturala dl raiun y de süa popolaziun. N’atenziun - vá inant le presidënt südtirolej - che nasc dal orenté da sconé la cualité de vita de che che laora, y dl bojëgn da sconé les pices realtés comerziales che n'á nia les ressurses che vá debojëgn por tigní davert 7 dis sön 7".

Propri por evité che massa na gran liberalisaziun penalisëies chës realtés economiches che garantësc l'ecuiliber te n raiun particolar sciöche chël alpin, êl gnü dé jö dl 2015 na norma d'atuaziun bele aprovada dala Comisciun paritetica, mo "blocada" dal Ministere, che ti conzedô ales Provinzies de Balsan y de Trënt da regolamenté i orars de daurida y stlüta di eserzizi de comerz al detai. "Les detlaraziuns de Di Maio - dij Kompatscher - deura la prospetiva che la preclujiun da laota pois se trasformé te n’aziun coordinada tla medema direziun. La Provinzia de Balsan podess deventé le precursur de na manira nöia da ciaré da arjunje n svilup economich sostenibl che tëgn cunt de dötes les porsones interessades. An podess insciö desmostré che na regolamentaziun ecuilibrada di orars de daurida di eserzizi ne danejëia nia l’economia y ti garantësc cinamai ai lauranti le dërt de palsa la domënia y i santus, y sostëgn insciö na majera orenté dles families da cumpré ite tl tëmp lëde".

USP