Atualità
Defribiladus d’oblianza tl sport, cursc de ajornamënt
Pro vigni evënt sportif mëssel ester presënta na porsona che sais da adoré n defribiladú. Löm vërda dala Junta ai cursc de ajornamënt
Tl Südtirol, sciöche tl rest dl’Europa, é öna dles maius gaujes de mort l'infart che pó gní a se le dé ince tratan les ativités sportives. Por chësta rajun él gnü aprové sön livel statal la norma che prevëiga l’oblianza de defribiladus tratan dötes les manifestaziuns sportives che vëgn organisades te implanc aposta. “I sun sigüsc che ince tl sport mëssel gní metü en pratica dötes les mosöres por garantí les mosöres por salvé les vites y por chësta rajun él gnü aprové bele tl 2015 les diretives d’oblianza de defribiladus”, spliga l’assessuria por la sanité Martha Stocker. Da pert di Comuns, proprietars de gran pert dles strotöres sportives él gnü cumpré cina sëgn cun n contribut provinzial indöt 456 defribiladus.
Do la cumpra dles atrezadöres messará les assoziaziuns sportives amatoriales che laora tl setur professional garantí tratan les competiziuns sportives inserides tl calënder ofizial la presënza de na porsona formada che sides cualificada por adoré l’atrazadöra d’emergënza. Al ne é nia conscidrades dal’oblianza les competiziuns che vëgn organisades aldinfora di implanc sportifs y les ativités, tratan chëres che an adora nia n sforz particolar dl aparat cardiologich sciöche por ejëmpl soghé a biliard o le jüch dl sciach. Les assoziaziuns sportives a livel profescional mëss ince garantí l’oblianza de n defribiladú tratan i alenamënc. Bele tl 2015 él sté tröc volontars dles assoziaziuns sportives che á fat la formaziun nezesciara por adoré i aparac. Chësta formaziun döra 8 ores y vigni dui agn mëssel gní fat n curs de ajornamënt de cater ores.
“Le Minister á confermé l’oblianza de ajornamënt vigni dui agn y chësta norma vëgn rezepida a livel provinzial cun na delibera dla Junta”, sotlignëia l’assessuria Stocker. La priorité prinzipala sará sëgn la formaziun dl personal por l’adoranza di defribiladus. “I un ciaré da fá a na manira che düc chi che á bele fat n curs de formaziun o n ajornamënt de cater ores pois ajorné sües competënzes tl setur cun n curs de ater cater ores”, sotlignëia l’assessuria por le sport Martha Stocker. L’Ofize Sport dla Provinzia menará inant informaziuns plü monüdes ti proscims dis a dötes les assoziaziuns sportives por ci che reverda les indicaziuns de carater tecnich.
USP
