Atualità

Rodes sön les sëmenes de munt, ombolc podará proibí le transit

La Junta provinziala á aprové la mudaziun de n regolamënt che reverda le transit dles rodes sön la rëi dles sëmenes de munt.

I ombolc ará la poscibilité da preodëi proibiziuns por rajuns de segurëza o de impedimënt dl'ativité agricola y forestala. (Foto www.pixabay.com)

Tl Südtirol vëgn la rëi dles sëmenes sovënz adorada ince da che che vá cun la roda, dantadöt da che che vá cun la mountain bike. Ince sce al n’é nia na proibiziun esplizita de transit sön les sëmenes che condüj sön les munts, él sovënz ti bosć o sön les strades forestales situaziuns de conflit cun che che vá sö por munt y nia ma. Porchël á la Junta provinziala aprové sön proposta dl assessur Arnold Schuler, do na prozedöra partezipativa, la mudaziun de n decret de messé dl 2000 sön le regolamënt d’esecuziun dl ordinamënt forestal.

En concret ti vëgnel surandé ai ombolc di raiuns cun lian idrogeologich-forestal le podëi da "proibí le transit cun rodes sön la rëi de sëmenes o toc de chëstes, sce al vëgn a se le de porvia dl transit conflic cun che che vá a pe o l’ativité agricul-forestala". La proibiziun de transit por les rodes messará gní segnalada cun na tofla aposta, dl'osservanza dla proibiziun se cruziará le corp forestal dla Provinzia. Cina aldedaincö revardâ i limic dles rodes ma püc raiuns sot sconanza dla contrada y dl ambiënt (por ejëmpl le tru che condüj dala Forcella Lavaredo ales Trëi Pizes de Lavarëi) o la segurëza (n valgügn raiuns sön le Ritten olache al ê prigo de na ‘conviënza’ prigorosa danter rodes y ciavai).

 

USP

Galaria dales fotografies