Atualità
Inovaziun dles impreses y contribuc tla sanité: Criters nüs
La Junta á aprové criters nüs, sides por ci che reverda la promoziun dl’inovaziun dles impreses y le finanziamënt dles assoziaziuns tl setur dla sanité.
La Junta provinziala á aprové incö ai 8 de ma i criters de atuaziun nüs por ci che reverda la promoziun dl’inovaziun dles impreses. “I recuisic de azes al finanziamënt é gnüs mudá por ti pité ales aziëndes aiüc che ti vá adincuntra ales nezescités nöies dl’economia locala”, sotlignëia le presidënt dla Provinzia Arno Kompatscher. “Öna dles dificoltés prinzipales por le suzes de n’aziënda, dantadöt dles pices impreses, é la mancianza de ressurses nezesciares por porté debota i produc söl marcé dl laur”, spliga Franz Schöpf, le diretur dl Ofize Inovaziun y tecnologia dla Provinzia. Porchël él sëgn gnü a se le dé na mosöra nöia che prevëiga le sostëgn ales impreses por consulënzes tla preparaziun de campagnes de fundraising y de crowdfunding por la venüda de produc o sorvisc nüs. La spëisa plü alta che gnará finanziada é de 5.000 euro por campagna.
N ater intervënt reverda indere la trasformaziun digitala (Impresa 4.0) dantadöt ti seturs dl’automaziun dla digitalisaziun. Te chësc contest prevëiga i criters nüs n aiüt a chës impreses che á l’interes da atué proiec cun tecnologies de informaziun y comunicaziun modernes cun metodes de produziun y de destribuziun inovatives. Implü él ince ciamó preodü contribuc por curí spëises por la fasa preliminara de proiec de inrescida y de svilup che reverda la perioda dla valutaziun de idees nöies y dla fatibilité de n proiet.
La Junta provinziala á ince aprové i criters de finanziamënt nüs dles assoziaziuns che laora tla sanité. Les novités prinzipales preodüdes dala delibera aprovada dala Junta reverda i seturs dl’aplicaziun, i sogec publics y privac che á le dërt de assegnaziun di contribuc, i contribuc por les spëises ordinares, les formes de scomenciadies che pó gní finanziades y les spëises ametüdes por les scomenciadies. La definiziun y la regolamentaziun di criters é sëgn gnüs metüs te un n documënt. Ai ënc zënza fins de davagn ti podarál gní conzedü n contribut por n import che röia dal 50 cina al 75 porcënt dles spëises ametüdes. N ater aspet important di criters nüs é le fat che l’antizipaziun pó sëgn rové cina al 70 porcënt dl contribut preodü (ma por contribuc sura i 1500 euro). Al ne gnará nia plü finanzié assoziaziuns che fej ativités tl Südtirol mo che ne á degöna sënta tla Provinzia. Al é ince gnü fat na lista tlera cun les spëises ametüdes y chëres nia ametüdes al finanziamënt. “I vantaji prinzipai di criters nüs é la scemplificaziun y le smendrimënt dla burocrazia sides por les assoziaziuns che ince por i ofizi competënc”, spliga l’assessuria provinziala Martha Stocker.
USP
