Atualità

Presentaziun de "Rezetes": Liber nü che dëida rajoné por ladin

La publicaziun nöia “Rezetes por rajoné” realisada da Nadia Chiocchetti, Erna Flöss y Ingrid Runggaldier é gnüda presentada ai 13 d’aurí a Balsan.

La presentaziun dl liber nü "Rezetes por rajoné" é gnüda a se le dé incö ai 13 d aurí a Balsan (Foto: USP/rc)

Svilupé inant la competënza orala dl ladin, ti dé tles mans n stromënt ütl a chi che ó imparé da rajoné bun y arichí le material didatich por ladin: chisc é i obietifs primars dla publicaziun nöia “Rezetes por rajoné” realisada dal Ciamp Inovaziun y Consulënza dl Departimënt Scora y Cultura ladina. La publicaziun nöia é gnüda presentada ai 13 d’aurí a Balsan dala coordinadëssa dl proiet Nadia Chiocchetti. Por l’assessur por la scora Ladina Florian Mussner é la publicaziun nöia “n stromënt important por renforzé les competënzes orales de scolares y scolars y d’atri interessá, chël ó dí partezipanc y partezipantes a cursc de ladin”. Al ne é insciö nia ma n aiüt por les families locales da arichí sües competënzes tl rajoné ladin, ma ince n stromënt de gran valüta por l'integraziun de porsones che é rovades a vir te nostes valades, insciö Mussner. "L'integraziun gareta dantadöt cun l'imparé les rujenedes", dij l'assessur.

Ince l'intendënt Roland Verra á sotligné la gran valüta dles "Rezetes" ince sciöche colaboraziun garatada danter les valades ladines de Fascia, Gherdëna y Badia. "La realisaziun de material didatich nü é öna dles competënzes prioritares dl Ciamp Inovaziun y Consulënza che ti vá a bëgn nia ma dla scora, mo ince sura la scora fora, insciö Verra. Ince le diretur de Repartiziun, Felix Ploner, sotrissëia le valur dla publicaziun, che stlüj na locia tla disposiziun de materiai d’insegnamënt dl ladin.

Rezetes por rajoné é na racoiüda d’ativités didatiches por le svilup dla competënza orala dl ladin che an pó anuzé sciöche material de sostëgn por les leziuns de ladin, anfat ciöna che la metoda d’insegnamënt é. La publicaziun por ladin é na traduziun y ince n adatamënt dl liber talian “Ricette per parlare” de Sonia Bailini y Silvia Consonno, publiché da Alma Edizioni tl 2002. La verjiun ladina é gnüda coordinada y traslatada da Nadia Chiocchetti deboriada cun Erna Flöss y Ingrid Runggaldier. “Le liber pó gni adoré dër bun da s’eserzité tl ladin a usc, al é scëmpl, adaté a deplü liví y saurí da capí. Mo an mëss lauré tl grup, de dui o deplü, aladô dles propostes che le liber fej. Ara ne se trata nia de n liber da imparé da susc. Al sará dessigü dër aprijé da studëntes y studënc por sües ativités interessantes”, á dit Chiocchetti.

Le liber é n stromënt didatich por insigné les varietés dl ladin dolomitich, porchël él gnü fat verjiuns de valada: badiot, gherdëna y fascian cun ejëmpli unitars y de condivijiun. Chësta publicaziun gnará ince tuta ca sciöche meso didatitch dertan i cursc de ladin por nialadins organisá a Balsan y tignis da Daria Valentin.  Indöt él 39 capitui, partis sö te de plü liví da elementar cina mesan y alt. Dla pert grafica s'ál crüzie MarameoLab.

“Rezetes por rajoné“ ciafon da cumpré tla sënta de Inovaziun y Consulënza sides a Balsan (strada Binder 29) co ince a San Martin de Tor tl Zënter Pedagogich a Picolin. Por de plü informaziuns: www.pedagogich.it

USP

Galaria dales fotografies