Atualità

Dala Junta: 6 miliuns por l’inovaziun dles impreses

La soma de contribuc por sostigní i investimënc tl’inovaziun dles pices impreses y chëres mesanes é gnüda renovada cun criters de assegnaziun nüs.

Löm vërda dala Junta ai contribuc por les piceres impreses y chëres mesanes (Foto USP)

La Junta provinziala á aprové incö, ai 10 d’aurí la soma de 6 miliuns de euro de contribuc por investimënc ales pices impreses y a chëres mesanes tl Südtirol. “Cun chësta bandida orunse ti dé n impuls ales aziëndes plü piceres por podëi fá investimënc sciöche preodü dal’aministraziun”, á dit le presidënt dla Provinzia Arno Kompatscher. Iniann él gnü mudé, adöm ai rapresentanc dl monn dl’economia, i criters d’assegnaziun di punc por garantí na destinaziun dles ressurses plü a puntin.

“Chësc ann ti gnarál insciö dé la priorité al sostëgn dla digitalisaziun y dl’inovaziun”, á dit Kompatscher. Öna dles novités da iniann é ince de plü gradatöres despartides, öna por les impreses dl comerz y di sorvisc cun un n miliun de euro. D’atres döes gradatöres reverda indere i seturs dl’industria y dl artejanat cun 2,5 miliuns de euro a desposiziun. Al vëgn paié fora contribuc por investimënc che vá dai 20.000 ai 500.000 euro. Le contribut sará de alplü 20 porcënt dla soma dl investimënt y ne pó nia superé la soma de 100.000 euro.  L’ann passé él gnü presenté 571 domandes, indöt él gnü conzedü 178 contribuc ales aziëndes. Informaziuns plü monüdes ciafon sön la plata internet dla Repartiziun Economia.

USP

Galaria dales fotografies