Atualità

Tematica dl lu, incuntada por chirí soluziuns

Rapresentanc di seturs dla politica, agricoltöra y ciacia s’á incunté dan da püch por chirí soluziuns ala chestiun dla presënza dl lu tl Südtirol.

Rapresentanc de politica, agricoltöra y ciacia s’á incunté inier ai 9 d'aurí a Balsan por chirí soluziuns ala tematica dla presënza dl lu tl Südtirol

La chestiun dla presënza dl lu tl Südtirol é stada tl zënter de n’incuntada danter rapresentanc dla politica, dl’agricoltöra y dla ciacia metüda da jí inier, ai 9 d’aurí dal assessur provinzial por l’agricoltöra Arnold Schuler. “Al é preodü de plü proiec cun mosöres de prevenziun sön döt le teritore, sciöche por ejëmpl tla Val Venosta”, á dit Schuler. Ince l’assessur provinzial por l’ambiënt Richard Theiner á sotligné che “al  ne sará nia poscibl da detlaré che al n’é te döt le Südtirol degügn lus, gnanca tl dagní. Al é porchël fondamental da porvé da limité le status de sconanza dl lu”, spliga Theiner.

Le parlamentar europeich Herbet Dorfmann á anunzié che al é söl program na conferënza dedicada ala chestiun dl lu ai 15 de ma a Bruxelles. Dorfmann á ince sotligné che la popolaziun di lus ne é nia plü al prigo y che porchël podess la diretiva sön le habitat flora y fauna  gní elaborada danü smendrin le livel de proteziun atual dl lu a livel europeich conscidran les esigënzes a livel local.

Le diretur dl Ofize Ciacia y pëscia Luigi Spagnolli á recordé i trëi punc nezesciars por tó demez ejemplars de lus. La popolaziun mëss ester te de bunes condiziuns, denant co tó fora n lu da na popolaziun mëssel gní atué mosöres de prevenziun y al pó ma gní prelevé lus da na certa pericolosité. “La diretiva habitat gniss insciö respetada, ince deache la popolaziun ne foss nia en prigo”, spliga Spagnolli.

Le diretur dl’Assoziaziun di jagri, Heinrich Auckenthaler, á orü recordé che la popolaziun dl lu ne é bele dal 2011 nia en prigo y che porchël é, do so arat, le livel de proteziun atual massa alt. “Dantadöt por les pastöres sö por munt él nezesciar da ciafé soluziuns por la problematica dl lu”, á dit le presidënt dla Lia di paurs (Bauernbund) Leo Tiefenthaler. “I paurs se damana da avëi n teritore lëde dai lus, la politica á l’inciarida da ciafé mosöres da apliché”, insciö Tiefenthaler.

USP

Galaria dales fotografies