Atualità
Imajes dles ëres ti reclams, istituí le Fair Image Award
La Comisciun por l’avalianza dles oportunités organisëia le Fair Image Award söla tematica dl’imaja dles ëres ti retlams. Le termo por i proiec é ai 30 de ma.
La Comisciun provinziala por l’avalianza dles oportunités á istituí n pest a bëgn di retlams che respetëia l’imaja dles ëres y che porta le titul “Fair Image Award”. Le pest á le fin da daurí na debatüda sön l’adoranza respetosa dl rode y dl’imaja dles ëres y de n’avalianza reala danter ëi y ëres. “Tl pröm moment él nosta intenziun da surandé n pest negatif dediché a retlams che vá dl vers dl sessism, spo un tut la dezijiun da jí tl vers de n pest positif”, á dit incö danmisdé ai 5 d’aurí la presidëntda dla Comisciun por l’avalianza dles oportunités, Ulrike Oberhammer, tratan la conferënza stampa de presentaziun dla scomenciadia. “I retlams fej pert de nosta sozieté y vëgn registrá ince te na manira indireta. N retlam pó gní definí sessist sce al vëgn rapresenté n jëne desponibl sot al punt de odüda sessual o tres formes stereotipades o ince che l’ëra vëgnes rapresentanda ma cun na pert dl corp che fej referimënt ala sessualité.”
Le concurs dess stimolé le confrunt söl rode dles ëres ti retlams y al pó tó pert döes les porsones residëntes tla Provinzia de Balsan che á complí i 16 agn. Implü é les iscriziuns davertes por impreses che á la sënta tl Südtirol, assoziaziuns o grups de almanco cinch prosones (3 mëss ester ëres) y classes scolastiches cun n’eté mesana de almanco 16 agn. Le proiet pó gní presenté por todësch, talian o inglesc, la tematica sará chëra dles “ëres y i retlams”. L’assessuria por l’avalianza dles poscibilités Martha Stocker á recordé che ara é bele coriosa da odëi les propostes che gnará dades jö”.
Al pó gní dé jö films cörc, retlams o chedri digitai, en general materiai che pó gní adorá online. I proiec messará gní dá jö cina ai 30 de ma dl 2018, ala pröma porsona tlassificada ti gnarál assegné n pest de 7.500 euro y na statua realisada dal’artista Sieglinde Tatz Borgogno che passará da ann a ann ales davagnadësses o ai davagnadus dl concurs. Por de plü informaziuns pó i partezipanc contaté l’Ofize Ëres (ufficiodonna@provincia.bz.it - 0471 418690) o consulté la plata internet www.provincia.bz.it/pariopportunita.
USP
