Atualità
Dala Junta: Criters de cualité nüs por les organisaziuns turistiches
La Junta provinziala á aprové i criters nüs por les organisaziuns turistiches che reverda la daurida di ofizi, i contac cun l’IDM y tröp d’ater.
Te süa sentada di 20 de merz á la Junta provinziala aprové i criters de cualité nüs por les organisaziuns turistiches che laora tl Südtirol. Al se trata de na seria de diretives che les organisaziuns mëss ademplí por avëi azes ai contribuc publics y ales somes trates site cun la cuta comunala de sojornanza. Al se trata de mosöres che reverda le coordinamënt dles campagnes de publizité, sciöche ince dla cualificaziun profescionala dl personal.
Por ci che reverda les strotöres vëgnel damané la daurida di ofizi por almanco 6 ores por 6 dis al’edema y la poscibilité da podëi arjunje les strotöres al telefon o tres internet por döt l’ann. Vigni organisaziun messará lauré fora n program strategich de trëi agn y n program d’ativité anual. Por ci che reverda les mosöres de comunicaziun él preodü almanco döes incuntades al ann cun na sënta destacada dl’aziënda speziala IDM Südtirol por coordiné les scomenciadies.
Danter i compic d’oblianza dles organisaziuns turistiches él chi da messëi mëte ite tla banca dac dla Provinzia dla Balsan les informaziuns che reverda hotí, ostaries y eserzizi de sojornanza, sciöche ince da ajorné les plates internet por ci che reverda manifestaziuns, scomenciadies y escurjiuns.
Por ci che reverda la comunicaziun mëss i obietifs gní concordá cun l’IDM Südtirol y al é ince preodü che les organisaziuns adores les mersces locales y la merscia dl Südtirol por vigni comunicaziun daite y defora dala. "Chësc ince por evité che al vëgnes lauré te na manira dopla söi medemi contignüs y strategies", á splighé le presidënt Arno Kompatscher. Implü él preodü por i surastanc la laurea trienala o en alternativa la nmatura cun lapró dui agn de esperiënza profescionala tl setur dl turism. Implü vëgnel ince damané la conescënza dl talian y dl todësch y de n terzo lingaz implü. Do l’aprovaziun da pert dla Junta gnará la delibera tosc publicada tl Boletin ofizial dla Regiun Trentin Südtirol y jará en fora.
USP
