Atualità

Dala Junta: Finanziá 14 films, retüda por 3,5 miliuns de euro

La Junta a á aprové la pröma call por le finanziamënt de films. Al vëgn sostigní 14 proiec, al é preodü che al röies zoruch sön le teritore ca. 3,5 miliuns.

Sostëgn ala realisaziun de films y documentars tl Südtirol: i dis che al vëgn tut sö sön le teritore provinzial preodüs é 107 (Foto IDM/Martin Rattini)

Le Südtirol se confermëia un di posć por tó sö films plü aprijé a livel internazional, y la confermaziun vëgn dala pröma call de finanziamënc por proiec de films y series dla televijiun. Pro la Film Fund & Commission de IDM Alto Adige él gnü dé jö 23 propostes da sotmëte al'atenziun dla junta provinziala por l’aprovaziun definitiva, 14 á ciafé n arat positif dala comisciun de esperc. Incö (ai 20 de merz) él rové adalerch l'autorisaziun da pert dl esecutif de Palaz Widmann, che á aprové n stanziamënt de 2.591.000 euro, soma che portará por mirit fla faziun Südtirol ca. 3,5 miliuns de euro tl raiun provinzial sot forma nia ma de valur ajunté dal punt de odüda dl'imaja turistica, mo ince de ocajiuns de laur por profescionisć jogn dl post.

La condiziun por ciafé n finanziamënt publich é che les produziuns por la televijiun y de films investësces tl Südtirol altamo le 150% de ci che ai á ciafé; mesanamënter arjunj chësta soma le 180%. I dis che al vëgn tut sö sön le teritore provinzial preodüs é 107, i proiec finanziá é 14, 7 é südtirolesc, 4 di Paisc Todësc, 2 dal rest dla Talia y 1 dal Belgio. "La Provinzia de Balsan - á sotrissé le presidënt Arno Kompatscher - é oramai deventada n post por tó sö films important a livel internazional. Che che vëgn a tó sö chiló da nos sá che tl Südtirol pól se lascé sön na gran profescionalité che s’á svilupé te düc i seturs: dai artejans ala logistica, dai artisć ales comparses".

Danter i highlights de chisc finanziamënc él zënzater le film “Honey in the head” che é le remake internazional de n film de Til Schweiger (“Honig im Kopf”), che é gnü odü ti paisc de lingaz todësch tl cinema da passa 7 miliuns de porsones.

Al á ciafé le finanziamënt dla junta provinziala ince la cuinta sajun dla seria TV dër fortunada Un passo dal cielo, ambientada dantadöt sön le Le de Braies. Bëgn 7 produziuns locales vëgn sostignides dala Film Fund & Commission de IDM Alto Adige. Danter chëstes él ince “Die große Zinne”, n documentar che á sciöche regist la liënda dl alpinism mondial Reinhold Messner. Tl ‘injunta ciafëise düc i detais sön les produziuns aprovades dala junta.

 

USP

Galaria dales fotografies