Atualità
Plann sanitar 2016-2020, positif le bilanz amesaite
Le pröm bilanz dl plann sanitar provinzial é positif: les prömes mosöres por ci che reverda la prevenziun, l’assistënza y la colaboraziun di ospedals é atuades.
L’invedlamënt dla popolaziun, l’aumënt dles maraties croniches, le svilup dla medejina, la mancianza de peronsal spezialisé, les ghiranzes mudades dles porsones y le cambiamënt dles condiziuns iuridiches generales: chëstes é arees de intervënt generales dl plann sanitar provinzial 2016-2020 aprové dala Junta dan plü de un n ann. Püch do l’aprovaziun él le Departimënt Sanité y l’Aziënda sanitara provinziala che á definí n program deboriada por la realisaziun di obietifs. Al é ince gnü istituí n grup de laur che controlëia regolarmënter l’atuaziun dles mosöres preodüdes. Tratan la sentada dla Junta él l’assessuria Martha Stocker che á presenté ai atri componënc dla Junta la situaziun d’atuaziun dl plann.
Le bilanz amesaite vëgn araté dër bun: “I sun tl atué les mosöres sön na dorada de cin agn – spliga la Stocker – y tl pröm ann él bele gnü realisé n cuinto dles mosöres preodüdes, partides sö aladô di seturs dl’assistënza sanitara, dla prevenziun söl teritore y ince dl’assistënza de caji de pröm aiüt.” Tl caje dla prevenziun vëgnel lauré sön la sensibilisaziun dla popolaziun tres le proiet “Evviva” por le renforzamënt dl’autogestiun y dla scomenciadia “ativité fisica sön rezeta”. I obietifs prinzipai é da motivé la popolaziun da se tó la responsabilité de süa sanité, resté atifs y conservé na cualité dla vita alta.
Tl ciamp dl’assistënza sanitara söl teritore él gnü arjunt n’acordanza söl contrat integratif provinzial di doturs de medejina generala che conzedará da realisé orars de daurida plü lunc ti ambulatori. N ater vare important é gnü fat dal percurs d’assistënza nü por la gravidanza y le sté de pert, por mirit de chël che les ëres pó gní socodides a livel provinzial cun n’atenziun particolara a sües esigënzes, dantadöt da pert dles efons. N ater proiet de sostëgn dl’assistënza sanitara a ciasa é l’istituziun dla figöra de n’infermiera de familia che vëgn bele porvé fora tl raiun sot Balsan. Les portines uniches por l’assistënza y la cura é ince bele gnüdes realisades te düc i raiuns sanitars dla Provinzia.
"Por ci che reverda l’assistënza por acuc él gnü fat n vare important tl ciamp dla medejina d’emergënza cun le joré de nöt dl’elisocurs – sotrissëia l'assessuria - y al é gnü ince metü a jí la reorganisaziun dl pröm aiüt. Implü vá inant le mioramënt dla colaboraziun danter i ospedai aladô dl prinzip de n ospedal cun döes sëntes". Te düc i raiuns sanitars él jü zoruch tl setur dl’assistënza por acuc i dis de sojornanza di paziënc tles seziuns desvalies dl ospedal. Chësc a da nen fá cun l’ampliamënt dl numer de lec por caji post-acuc y l’introduziun di lec de transit, olache al ti vëgn dé assistënza ales porsones tla fasa de mioramënt cina che ai pó s’un jí a ciasa.
"Sciöche al ê da preodëi él n pü’ jü sö ince le numer dles prestaziuns spezialistiches - prezisëia Martha Stocker - y te chësc ciamp ciarunse da svilupé l’assistënza ambulatoriala ti raiuns sanitars. Cun l’adoranza de formes contratuales desvalies sarunse ince bugn da ciafé le personal medich che vá debojëgn nia ma por garantí i sorvisc, mo ince por podëi smendrí les listes d’aspetanza por les vijites spezialistiches". Spo röiel ciamó pormez che ara é jüda, por mirit dles mosöres bele adotades, da archité l’aumënt di cosć. "Le plann sanitar provinzial 2016-2020 – stlüj jö l'assessuria - rapresentëia n obietif important por chël che al jará sigü debojëgn da adoré düc i cin agn: porchël vál debojëgn da jí inant a na moda coerënta sön chësc tru y se tigní ince i proscimi agn ala strategia che vá debojëgn cun düc i colaboradus y i partner che laora tl cheder dl’assistënza sanitara".
USP
