Archif - Novités sön l'ejam de bi- y trilinguism

Fiera FUTURUM 2018

Che che ó atesté sües conescënzes de talian, todësch o ladin aladô di liví europeics pó s’informé avisa ince pro le stand dl Sorvisc Ejams de bi-y trilinguism pro la Fiera FUTURUM 2018. I sarun a desposiziun por porté dant dötes les gran novités sön la digitalisaziun: dal’iscriziun online al atestat digital, dala plata dles valutaziuns dl ejam al atestat de presënza ortiá digitalmënter.
I ves aspetun ala Fiera FUTURUM 2018 che sará dai 20 ai 22 de setëmber dl 2018, pro la Fiera de Balsan, stand n. 5 dl setur Educaziun permanënta dales 9.00 ales 17.00.


 

Simulaziun dl ejam a usc

I ves inviun a tó pert al’incuntada d’informaziun Compact-Info olache i podarëis odëi sciöche al vëgn fat l’ejam a usc. I podarëis savaié da fá l’ejam y la comisciun ves dijará atira sciöche ara é jüda. Ara ne ves dijará nia ma sciöche ara é jüda y coche ara valutëia osc livel linguistich, mo ince sön ci aspec ves conzentré da ves arjigné ca. Ala Compact-Info él ince saurí da ciafé n partner de conversaziun.

Can? Al 18 d'otober dl 2018 dales 8.30

Olá? Pro le Sorvisc Ejams de bi- y trilinguism, strada Dr. J. Perathoner 10, Balsan

An mëss se scrí ite online

De plü informaziuns ciafëise chiló.

Simulaziun dl ejam scrit

Orëise odëi sciöche l’ejam scrit funzionëia y porvé da le fá? I pitun la poscibilité da porvé da fá chësta pert dl ejam de bilinguism. A chësta moda vára da ciafé atira dala comisciun n feedback preziun sön osta prestaziun y val’ consëi prezius por canche i fajarëis le dërt ejam. Implü impararëise a conësce damí la strotöra dl ejam y a s’arjigné ca damí autonomamënter.

Can? Al 21 de setëmber dl 2018 dales 8.30

Olá? Pro le Sorvisc Ejams de bi- y trilinguism, strada Dr. J. Perathoner 10, Balsan

An mëss se scrí ite online.

De plü informaziuns ciafëise chiló.

Iscriziun al ejam

Dal 1° de jená dl 2019 pón ma plü se scrí ite al ejam a usc online. Porchël vál debojëgn de n’identité digitala, chël ó dí de SPID o dla Cherta di sorvisc ativada. Sce i n’ëis nia ciamó n’identité digitala, crüziesse por tëmp y ora y damanede do le SPID.
Chiló ciafëise ciamó d’atres informaziuns sön co ciafé le SPID

De plü informaziuns sön i sorvisc online

Prozedöra de cerna por le tëmp 2019-2023

La prozedöra de cerna por la nominaziun dles comissares y di comissars d'ejam por l’azertamënt dla conescënza dl lingaz talian y todësch por le tëmp 2019-2023 é gnüda publicata tl Boletin Ofizial dla Regiun n. 14/IV di 04.04.2018.

Chiló ciafëise la bandida.

Curs de ladin

per se njenië ca al ejam de ladin per l trilinguism A - B

L ie daviert nce a duc i autri nteressei (chëi che adrova l ladin pra si lëur, studënc, reprejentanc de lies...)

Referënt: Marco Forni

Termins: 03, 05, 10, 12, 17, 19, 23, 24 de auril 2018
dala 17:00 ala 19:00 tl Istitut Ladin Micurá de Rü te Sëlva

Iscrizions: Istitut Ladin Micurá de Rü,Str. Nives 16/4 -39048 Sëlva - Tel. 0471 773225, e-mail: furmazion.gh@micura.it

Proscimamënter uniral metù a jì n curs de ladin per se njenië ca al ejam de trilinguism C - D

Curs de Ladin per chëi che sà bele n puech

L curs ie nce adatà per se njenië ca al ejam de ladin B1 ((livel C da n iade) - A2 ((livel C da n iade)
Termins: for de merdi y juebia ai
08, 10, 15, 17, 22, 24, 29, 31 de mei 2018 dala 17:00 ala 19:00
Post: Sëlva, Istitut Ladin Micurá de Rü, 17:00 - 19:00
Ref.: Karin Comploj

Iscrizions nchin ai 04.05.2018 pra l:
Istitut Ladin Micurá de Rü
Str. Nives 16/4
I-39048 Sëlva
tel. 0471 773225
e-mail: furmazion.gh@micura.it
Org.: Istitut Ladin Micurá de Rü

 

40 agn ejam de bi- y trilinguism

Chësc ann festejunse 40 agn dal’introduziun di ejams de bi- y trilinguism tl’aministraziun provinziala.

Te chisc agn é l’ejam de bilinguism gnü reformé de plü iadi y les novités á albü le fin da adaté tres deplü l’ejam ai bojëgns dla vita reala y aldedaincö él n ejam modern, che ti corespogn a n zertificat linguistich aladô dl CREC.

Ai 9 de novëmber dl 2017, en ocajiun dl de d’informaziun Compact-INFO, festejarunse l’aniversar adöm cun na conferënza stampa sön l’argomënt.

Mudaziuns y integraziuns dl D.P.R. di 26.07.1976, n. 752

Ai 23 de jügn dl 2017 vál en forza le Decret Legislatif di 4 de ma dl 2017, n. 76,  sön les normes de atuaziun dl statut spezial por la regiun Trentin-Südtirol cun les mudaziuns y integraziuns dl D.P.R. di 26.07.1976, n. 752, sön le proporz ti ofizi statai tla provinzia de Balsan y la conescënza di dui lingac tl’aministraziun publica y dl D.P.R. di 10.02.1983, n. 89, sön l’ordinamënt scolastich tla provinzia de Balsan.

 

Compact-INFO

Orëise conësce plü daimpró l’ejam de bilinguism y tó confidënza cun la situaziun d’ejam?
Cater iadi al ann, tla sënta di ejams tla strada Perathoner 10 a Balsan, pitarunse informaziuns sön i ejams de bilinguism.

  • Presentaziun di ejams de bilinguism
  • Simulaziun dl ejam a usc
  • Punt d’incuntada por le barat de conversaziun
  • Autoaprendimënt: consëis por imparé n lingaz

Ejëmpli nüs por s’eserzité

Por s’eserzité al ejam de bilinguism él a desposiziun dai 14.10.2017 incá trei ejëmpli nüs dla proa scrita a lingaz por vigni livel. An pó ti ciaré sön les plates dla proa scrita de vigni livel.

Tües impresciuns y tü consëis

Che che á fat l'ejam á a desposiziun n chestionar cun chël che ara vá da dí süa minunga sön la cualité dl sorvisc. Tla e-mail olache al ves gnará lascé alsavëi le resultat sarál n link aposta; sce i clichëis lassura rovëise pro n chestionar olache al vá debojëgn de trëi menüc por respogne a n valgönes domandes dër scëmples. Le formular de feedback ciafon ince sön la plata internet: tües impresciuns y tü consëis. Cun i dac coiüs adöm jarára da mioré tresfora la cualité dl sorvisc.

Ortografia nöia por le ladin dla Val Badia

Da merz dl 2015 incá él regoles d’ortografia nöies por le ladin dla Val Badia. L ‘ortografia da sëgn vel inant por n tëmp de transiziun de trëi agn, cina merz dl 2018. Do chësc tëmp valará ma plü les regoles nöies. Dötes les informaziuns sön l’ortografia nöia é da ciafé chiló.

Ativaziun dla Cherta di sorvisc

Da atira inant podëise ativé la Cherta di sorvisc por le pröm iade ince pro le Sorvisc ejams de bi- y trilinguism!

(Chësc ê cina ciamó ma poscibl ti comuns.)
Cun la Cherta di sorvisc ativada y le eGov-account podëise adoré düc i sorvisc online dla provinzia de Balsan - ince cun le smartphone o le tablet - y ince ves scrí ite al ejam de bi- y trilinguism.

Se scrí ite online é saurí y vá debota

Sëgn vára da se scrí ite online ai ejams de bi- y trilinguism. Cun la Cherta di sorvisc podëise ortié inant l’iscriziun (o la domanda de reconescimënt de zertificac linguistics o de titui de stüde) diretamënter da osc computer.

Problems cun la data d'ejam?

Sce i ne sciafiëis nia da gní a fá l'ejam sëise dër bel periá da desdí le plü debota che ara vá cherdan sö le numer 0471 413900 o menan na e-mail a ebt@provincia.bz.it. An podará fá fora na data nöia. Vigni post che vëgn lëde ti podará insciö gní dé a d'atres candidates y a d'atri candidac.

A chësta moda pó düc porté pro a smendrí i tëmps d'aspeta.