Reconescimënt de zertificac linguistics

I zertificac linguistics che vëgn relasciá da istituziuns internazionales reconesciüdes do avëi passé n ejam de lingaz aposta vëgn ince reconesciüs por l’ejam de bilinguism. Düc chisc zertificac se orientëia al Cheder de referimënt europeich en comunanza por i lingac y ti corespogn ai liví dl ejam de bilinguism aladô dla tabela chiló dessot.


Cheder de referimënt europeich en comunanza por i lingac 
Atestat de bilinguism
C2 /
C1 A
B2 B
B1 C
A2 D
A1 /

 

Zertificac linguistics reconesciüs

Metede averda: al ne vëgn nia reconesciü i atestac che zertifichëia la frecuënza de cursc de lingaz gnanca cun n ejam final passé cun suzes o d’atri zertificac linguistics dá fora da scores de lingaz nia zertificades ofizialmënter.

Por che Osc zertificat linguistich vëgnes reconesciü, messëise ciamó fá n ejam monolingual tl lingaz nia zertifiché chiló da nos, belanfat cal che é Osc  lingaz dla uma y Osc titul de stüde. Chiló dessot ciafëise na descriziun dl ejam por vigni livel.

 

Che?

Dötes les porsones interessades - anfat de ci nazionalité - pó te vigni momënt damané do le reconescimënt de zertificac linguistics por ciafé l'atestat de bilinguism. L'amisciun n'é nia liada a n titul de stüde. Sce an ó damané le reconescimënt de n zertificat linguistich de n livel che ne ti corespogn nia al diplom arjunt, pón zënzater le fá.

Co?

Por düc i liví vëgnel azerté sides les competënzes da ascuté sö y capí n test scrit, che ince les competënzes da lí y baié n lingaz.

An pó damané le reconescimënt de n zertificat linguistich ma por un n livel d'ejam su. Pornanche chësc percurs é stlüt jö pón indô presenté domanda por le medemo livel o por n ater livel. La domanda pó gní fata te vigni momënt online tres le SPID (co funzionëia pa l’iscriziun online).
SCE I N’ËIS NIA CIAMÓ CUMPLÍ 18 AGN: te n valgügn mëisc podarëise adoré le SPID di geniturs. Cina dailó podarëise adoré i formulars sön papier.

Le calënder di ejams vëgn elaboré eletronicamënter y te n ordin cronologich. Al momënt aspeton presciapüch 3-4 mëisc da canche an á presenté la domanda.
La domanda de reconescimënt de zertificac linguistics y l'ejam te un n lingaz é debann.

Olá?

I ejams te un lingaz vëgn ma fac tla sënta di ejams, tla secunda alzada dla str. Dr. Julius Perathoner 10 a Balsan. Le frabicat é dlungia le parch dla staziun dla ferata y an pó ince rové adalerch cun la coriera.

Can?

I ejams te un n lingaz vëgn tignis fora por döt l'ann te un n de cun scomenciamënt dales 8:30.
Le termin dl ejam pó gní sburlé n iade su, sce ara ne vá nia da ester presënc en le de dl ejam, cun na telefonada o na e-mail.
Problems cun la data dl ejam

Resultat dl ejam

Le resultat dl ejam vëgn lascé alsavëi por scrit tres e-mail cina trëi dis da laur do la data dl ejam.