Racomanaziuns y consëis

Imparé parores plü saurí
• Ciara da d'adoré tü aparac y media ma por talian o todësch aladô dl lingaz olache te stëntes le plü:
- smartphone, laptop, tablet i.i.
- televijiun y films
- radio y audiolibri
- foliec, revistes y libri
- jüc y apps
• Ciara da imparé parores nöies tres en combinaziun cun d'atres parores (sostantif + verb, verb +  preposiziun y i.i.) por schivé fai tl'adoranza. 
• Por vigni parora nöia ciara da formé punc-lian che te dëida recordé, por ejëmpl assozian la parora a na storia, n'imaja, n recort, na melodia o n sentimënt. 
• Fá l'adoranza de schedes. N valgügn ejëmpli ciafeste por ejëmpl chiló.
• Ciara da d'adoré dizionars online. Insciö poste ascuté sciöche an pronunziëia indortöra la parora che t'as chirí y schivé la scritöra fonetica complicada di dizionars tradizionai. 
• Scrí les listes da cumpré ite ma tl lingaz olache te stëntes le plü.
• Taca sö post-it cun parores nöies te tüa abitaziun. Incoli sö por ejëmpl sön spidl te bagn o sön üsc dla frescara.

Conversaziuns

• Eserzitëiete da baié te na manira fluënta te cuntan a te instës/instëssa de sciöche t'as passé le de.
• Ara nen vá dantadöt che t'es bun/buna da comuniché y da te fá capí. I fai toca lapró. Ne sté a te lascé descorajé.
• Ciara da capí en general le significat y ne sté a te impunté sön na parora determinada.
• Cun porsones de lingaz dla uma ciara da baié por todësch o talian (aladô dl lingaz olache an se stënta le plü), ince sce chëstes oress mudé lingaz por slisiré la comunicaziun.

Imparé cun suzes
• Impara regolarmënter fajon tres indô de pices palses. Al é ideal fá unités de 30 cina 50 menüc.  
• Fá repetiziuns de ci che te as imparé te intervai regolars por che l'informaziun röies te tüa memoria a dorada lungia.
• Incuntete cun compagns/compagnes por simulé conversaziuns d'ejam y smendrí insciö la nervosité.
• Ciara da ciafé fora pro ci tipo da imparé che te toches. Insciö vára da d'adoré tües forzes y te fajaras ince plü saurí da imparé. Tl internt él da ciafé de vigni sort de tesć debann, por ejëmpl: https://www.philognosie.net/denken-lernen/lerntypen-test-welcher-lerntyp-bin-ich
• Ciara da dormí assá y da mangé sann.

y dantadöt...
• …scriete pormó ite al ejam canche te sëntes sigü/sigüda assá.