Sessualité

La sessualité é öna de chës energies che determinëia la vita y che forma l’identité y le svilup individual de vigni porsona. Ara é liada a valurs y regoles, sentimënc, speranzes, aspetatives y esperiënzes.

L’inciaria dl laur cun la jonëza é chëra da acompagné y informé sön chëstes tematiches zentrales de vita. Chësc vëgn dant sot forma de pedagogia sessuala y é dlungia l’informaziun la poscibilité da se dé jö cun i sentimënc, l’amur, l'amizizia, la ligrëza y la frustraziun te n ambiënt sigü y cun porsones cualificades.

Le fin é chël da arjigné ca la jonëza a n raport responsabl cun süa sessualité. Chësta responsabilité stlüj ite le se fistidié de se instësc, di partners, di raporc y dla sanité.

Inciaries dl Ofize Sorvisc cun la jonëza

L’Ofize Sorvisc cun la jonëza sostëgn le ciamp dla pedagogia sessuala te de plü formes: laur tla rëi, colaboraziun tla publicaziun de materal pedagogich-sessual, responsabilité por i proiec a livel provinzial, sostëgn finanziar por proiec, material d’informaziun y leteratöra sön chësc argomënt.

Al momënt él tla medema strotöra dl’Ofize Sorvisc por la jonëza todësch ince na sënta provisora de pedagogia sessuala.

La sënta é resposabla:

  • dla coordinaziun dl percurs pedagogich-sessual MOSAIK (de plü informaziuns ciafëise sön la plata www.netz.bz.it/14d2704.html) (Link forest)
  • dla coordinaziun de workshops “renforzé & animé”, olache al vëgn aprofondí les tematiches cun workshops de 3 ores l’un por grups d’eté desvalis y en pert ince cun na spartiziun di sesc. De plü informaziuns ciafëise chiló dessot;
  • dla consulënza pedagogich-sessuala por lauré cun i mituns, les mitans, la jonëza y te grups tres consulënza, laur de conzet y materiai;
  • dl svilup y dla coordinaziun d'ofertes pedagogich-sessuales.

Sostëgn y ofertes por colaboradus y colaboradësses a tëmp plëgn y che laora tl ciamp dl volontariat

Sëntes y reladus y reladësses

Ti ultims agn él gnü organisé tl Südtirol de plü cursc de formaziun de personal pedagogich-sessual. Pedagoghes y pedagogs sessuai pita a scores, te istituziuns dl laur dla jonëza y dla sozieté, por geniturs y por le personal che insëgna ofertes, referac y workshops desvalis.

Tematiches zentrales pó ester por ejëmpl: la puberté, la spligaziun dl corp y dla sessualité, la pornografia y la violëza sessuala.

Na pert dl personal pedagogich-sessual che laora tl Südtirol se á metü adöm tla plataforma de pedagogia sessuala Südtirol.

Sön la plata www.sexualpaedagogik.it (Link forest) pón ciafé reladus y reladësses por workshops pedagogich-sessuai desvalis che trata de plü argomënc y por de plü grups spezifics.

L’Academia por la formaziun sessuala (Link forest) pita ativités de formaziun desvalies por porsones interessades al ciamp pedagogich-sessual, sciöche ince consulënza y de vigni sort de workshops y/o seminars.

L‘Uniun Centaurus, scomenciadia buserënta dl Südtirols (Link forest) pita consulënza, sostëgn y cursc de formaziun y/o workshops por istituziuns por le laur cun i mituns, les mitans y la jonëza sön l'argomënt „varieté sessuala“.

Young + Direct pita consulënza y informaziuns sön l’argomënt „sessualité“ por la jonëza, sciöche ince por i colaboradus y les colaboradësses dl laur cun i mituns, les mitans y la jonëza. Sön la plata internet ciafëise tröpes informaziuns y links, sciöche ince la APP "Condomfinder" www.young-direct.it/de/sexualitaet/nuetzliches/condomfinder (Link forest) por ciafé l’automat dai presservatifs plü dlungia. Chësta APP pó gní desćiariada debann.

Brosciüres d’informaziuns por la jonëza

„info@boys" – por todësch y talian

„info!girls“ – por todësch y talian cun n glossar por ladin
Les brosciüres pó gní comanades tl Ofize Sorvisc por la jonëza o tres online@young-direct.it.

Brosciüra cun consëis de sigurëza por les mitans Sicherheitstipps für Gitschn - informaziuns y consëis por la prevenziun de violënza sessuala – por todësch y talian

La brosciüra pó ince gní desćiariada sot la plata www.provinz.bz.it/chancengleichheit/service/publikationen.asp (Link forest).

Implü él ince la APP cun informaziuns, misciuns de contat, cianties sön la violënza y n botun SOS. Chësta pó gní desćiariada debann sot la plata www.provinz.bz.it/chancengleichheit/mediathek/app.asp (Link forest)

Argomënc di workshops renforzé & animé

renforzé & animé é dui argomënc de workshops sön le corp, les relaziuns, la sessualité, i sentimënc, la prevenziun de violënza sessuala por la jonëza y porsones adultes jones. I workshops döra 3 ores l’un, é adatá por vigni grup spezifich (eté y ses) y vëgn tignis da reladus, reladësses, pedagoghes y pedagoghs sessuai cun esperiënza.

Por de plü informaziuns y prenotaziuns: helga.mock@rolmail.net oder 340 6099649.

Workshop por renforzé les mitans y les jones sön la violënza sessuala y l’abus.

Le fin de chësc workshop é chël da conësce, nominé y sconé te na manira cosciënta i limic personai. Les partezipantes renforzëia tres eserzizi y jüc desvalis la coscënza de so corp, se dá jö cun l’argomënt dla violënza, olache ara mët man, olache an pó se defëne y olache an pó chirí sotëgn y aiüt. Implü ciafon tröc consëis de segurëza por les mitans, sciöche ince la brosciüra „Sicherheitstipps für Gitschn“ da tó para.

Grup spezifich
Mitans y jones dai 13 agn insö

Numer dles partezipantes
8 – 16

Reladësses
Dr.a Petra Fischnaller, spezialista por la prevenziun dla violëza cuntra les mitans, colaboradëssa tla ciasa dles ëres de Maran, pedagoga
&
Dr.a Claudia Pichler, spezialista por la prevenziun dla violëza cuntra les mitans, colaboradëssa tla ciasa dles ëres de Maran, assistënta soziala

Dorada dl workshop
3 ores

Workshop sön la prevenziun dla violënza sessuala.

La tematica “abus sessual” é te chësc momënt dër presënta ti media y tla sozieté, y chësc é dërt insciö. Dandadöt vëgnel ciaré da sconé, acompagné y renforzé i jogn sot ai 18 agn. Fora de chësc vëgn baldi i jogn ödüs tres demanco sciöche vitimes y tres deplü sciöche delincuënc potenziai.

Por ejëmpl tla Germania él un n jonn sön önesc vitima de violënza sessuala. Porchël vëgnel traté chisc argomënc:

  • reflesciun sura so corp, la sessualité y i sentimënc cun na pert particolara dedicada ales particolarités y ai clichés de tramidui i sesc;
  • ciamps didatics olache al vëgn eserzité y ponsé a mëte sü limic y azeté i limic di atri;
  • discusciun publica sön la violënza sessuala: ma chi che realisëia chësc fenomen pó se sconé. Lauré fora mosöres d’aiüt y strategies sce al vëgn presenté n caje concret de violënza sessuala.

Grup spezifich
jogn dater 11 y 15 agn

Numer di partezipanc
8 – 16

Reladú
Dr. Michael Peintner, educadú, pedagogh sessual, consulënt sessual

Dorada dl workshop
3 ores

Extra/ da tó para/ …
Cossa preferida, cun chëra che iö sciöche jonn me identifichëii

Da düc n püch? O impó döt atramënter?
Workshop sön ci che al sozed tl corp dles ëres.

Chësc workshop pita n iade de esploraziun tres le corp dl'ëra y trata danterater domandes sciöche “tan grana é pa efetivamënter na zela dl ü?”, “Por ci él pa bun ciafé le mëis?”, “Ciodí fejel pa datrai me avëi le mëis?“, “Ciügn é pa i dis fertii?“. Le workshop é organisé te na manira stimulanta y desvalia y mostra cun materiai aposta informaziuns importantes sön ci che al sozed tratan le mëis. Daimpröma vëgn inviá i geniturs interessá a na sëra d’inforamziun.

Grup spezifich
mitans danter 12 y 14 agn, 2a y 3a classa dla scora mesana

Numer dles partezipantes
8 – 16

Reladëssa
DDr.a Maria Masoner, stüde de psicologia y pedagogia, pedagoga sessuala, assistënta por le laur cun la jonëza

Dorada dl workshop
3 ores

Na bercstot por mitans y mituns sön le corp y la puberté

Le workshop baia de che che y ci che la puberté müda. I partezipanc aprofondësc sciöche la puberté funzionëia efetivamënter y se dá jö cun tröpes domades sön le corp sciöche “can crësc pa i polans y la berba?”, “co se müda pa i testicui y le penis?”, “ci tru fej pa le sperma?”, “can pó pa n ël fá mituns?”, “ci provochëia pa le testosteron?” – döt chësc te na manira stimulanta y adatada al'eté di partezipanc y adöm cun d’atri jogn. Daimpröma vëgnel organisé na sëra d’inforamziun por i geniturs.

Grup spezifich
mituns dater 11 y 13 agn

Numer di partezipanc
8 – 12

Reladú
Heinrich Lanthaler, assistënt sozial diplomé/ psicoterapist, pedagogh sessual

Dorada dl workshop
3 ores

Workshop por ëres jones dater 14 y 16 agn.

N workshop de trëi ores acompagnëia ëres jones dater 14 y 16 agn tres argomënc interessac sön “le corp dl'ëra”, “le mëis y la fertilité”, “le dotur dles ëres y la prevenziun” y formes d'amur y de relaziun desvalies.

Te n ambiënt löcher y da se sté saurí aprofondësc les partezipantes i aspec zentrai dl ester ëra cun jüc y materiai adatá. Le workshop vëgn tigní da na pedagoga sessuala cualificada.

Grup spezifich: ëres jones che ó aprofondí süa conoscënza sön so corp y la sessualité.

Grup spezifich
ëres jones dater 14 y 16 agn

Numer dles partezipantes
6 – 12

Reladësses
Manuela Kirchler, pedagoga soziala, educadëssa y pedagoga sessuala 
o
Cornelia Troger, pedagoga soziala, coladoradëssa por le laur cun la jonëza y pedagoga sessuala 

Dorada dl workshop
3 ores

Workshop sön la prevenziun.

Te chësc workshop de trëi ores ti vëgnel dé ala jonëza informaziuns de basa sön i mesi de prevenziun desvalis. I argomënc mëis, fertilité, gravidanza y maraties che an pó se taché sessualmënter vëgn tratá te na manira interativa y cun jüc. La jonëza vëgn sensibilisada sön l’importanza dla prevenziun y impara implü a conësce tröpes poscibilités de prevenziun.

Grup spezifich
jones y jogn dai 15 agn insö

Numer di partezipanc y dles partezipantes
6 – 12

Reladësses
DDr.a Maria Masoner, stüde de psicologia y pedagogia, pedagoga sessuala y coladoradëssa por le laur cun la jonëza
&
Dr.a Tanja Stuefer, educadëssa, pedagoga sessuala y coladoradëssa por le laur cun la jonëza

Dorada dl workshop
3 ores

Workshop sön la pornografia

Te chësc workshop de trëi ores vëgnel fat na discusciun sön l’argomënt dla pornografia adöm cun la jonëza: monns reai y fitifs y confrunt critich di stereotipi di sesc che vëgn rapresentá tla pornografia. Pröma de döt vëgnel baié di dejiders y bojëgns personai, sciöche ince dla promoziun dla perzeziun de so corp en relaziun a se instësc y te n raport. Tres esperiënzes sensitives vëgnel pité la poscibilité da slarié fora la perzeziun visiva en gran pert bele dan man.

Grup spezifich
jones y jogn dai 16 agn insö

Numer di partezipanc y dles partezipantes
6 – 12

Reladú y reladëssa
Dr.a Tanja Stuefer, educadëssa y pedagoga sessuala y colaboradëssa por le laur cun la jonëza
&
Robert Körner, pedagogh sessual

Dorada dl workshop
3 ores

Workshop interessant (ma) por jogn dai 14 agn insö!

Chësc workshop por jogn dai 14 agn insö trata chëstes domandes: Co y ci se müda pa te me, te mi corp? Ci sozed pa tla puberté? … Y ci fej pa l’ater ses? Ci é pa chël dl pröm amur? Ci sozed pa tratan le pröm iade?

Tramidui i reladus acompagnëia la jonëza cun sües domandes y respostes. La jonëza á la poscibilité da se dé jö adöm te n ambiënt löcher y da sté saurí cun süa identité, so rode y tröp d'ater.

Grup spezifich
jogn danter 14 y 16 agn

Numer di partezipanc
6 – 12

Reladús
Hubert Fischer, colaboradú por le laur cun la jonëza, pedagogh sessual
Lukas Schwienbacher, insegnant y educadú, pedagogh sessual

Dorada dl workshop
3 ores

Descurí i clichés di sesc te na manira teatrala.

Nos jun a chirí tres esperimënc teatrai y jüc ci che é tipicamënter feminil y tipicamënter masculin te nosc baié y fá. I se anuzun dl test fora dl toch “Norway today” de Igor Bauersima. Al ne vëgn damané degönes condiziun, a pert la vëia da spilené y curiosité sön sü ejëmpli.

Grup spezifich
jones y jogn danter 15 y 18 agn

Numer di partezipanc y dles partezipantes
8 – 14

Reladú y reladëssa

Thomas Troi, pedagogh teatral tl zënter de pedagogia teatrala de Porsenú

Dorada dl workshop
3 ores

Workshop por mitans danter 10 y 12 agn

Chësc workshop inviëia les mitans a descurí cosses interessantes sön le corp dl'ëra y le mëis. Tres ilustraziuns y simboi te n lingaz saurí y da respeté, sciöche ince confrunc tuc dal ambiënt de vita dles mitans vëgnel splighé te na manira saurida Ie coliamënt dl prozes dl mëis. Al vëgn ince traté le cör y les emoziuns y renforzé l’azes dl corp.

La show dl mëis vëgn pité te tröc paîsc europeics. De plü informaziuns ciafëise ince sön la plata www.mfm-projekt.de.

Daimpröma vëgnel invié i geniturs a na sëra d’inforamziun.

Grup spezifich
mitans danter 10 y 12 agn, 5a classa dla scora elementara y 1a classa dla scora mesana

Numer dles partezipantes
8 – 15

Reladësses
dot.a Evi Gufler, colaboradëssa por le laur cun la jonëza y pedagoga soziala
o
Dr.a Helga Mock, educadëssa y pedagoga sessuala
o
dot.a Gaia Mureda, efon y pedagoga sessuala

Dorada dl workshop
3 ores

Ofertes de workshops generai

Mosaik

Le Mosaik é n’oferta pedagogich-sessuala por zëntri dla jonëza che se adressëia ala jonëza dai 13 agn insö. Sot forma de n percurs cun n gröm de straziuns pó i partezipanc y les partezipantes se dé jö cun argomënc desvalis, adatá a süa eté y da tröpes variaziuns. I argomënc dles staziuns é danterater “i raporc”, “le corp”, “la prevenziun”, “les maraties che an pó se taché sessualmënter”, “la conoscënza”, “l’avalianza di sesc”, “i sënsc”. Le Mosaik é davert indöt 3 ores y vëgn acompagné da iade a iade da na pedagoga sessuala o da n pedagogh sessual.

De plü informaziuns ciafëise sön la plata www.netz.bz.it/14d2704.html (Link forest).

Rotaziuns

Les rotaziuns é na tecnica de autodefenüda inventada da ëres aposta por mitans y ëres. Chësta á sciöche fin le renforzamënt dla segurté de se instësc, le training da fá avarëi se instësc te na manira verbala y nia verbala, sciöche ince formes de autodefenüda fisica adatades ales ëres.

I cursc vëgn tignis tresfora ti istituc dla jonëza südtiroleja y de formaziun.

Medemo o impó döt atramënter

Workshop sön la varieté sussuala

Te chësc workshop dla scomanciadia busurënta Centaurus nen vára de informaziuns y dla sensibilisaziun por l’avalianza di sesc y manires de vita transgeniches. Tratan na discusciun orunse se dé jö cun formes de vita y de amur desvalies por tó y jí cun i preiudizi, i clichés y i stereotips. Le workshop é adaté a grups (classes de scora, grups jonii), döra 3 ores y vëgn tigní da n team de reladus y reladësses. Al vëgn ince pité la poscibilité da organisé n valgönes manifestaziuns de informaziun por adulc (geniturs, educadus y educadësses, colaboradus y colaboradësses por le laur cun la jonëza y le personal sanitar, sozial y scolastich. Contat pro: CENTAURUS scomanciadia buserënta dl Südtirol, infogay@centaurus.org.

Queerformat Südtirol - LGBTQI- la jonëza spliga

LGBTQ ó dí por todësch „lesbich – buserënt – bissessual – transgenich – queer". I workshops vëgn tignis dala jonëza buserënta, lesbica, bissessuala y trangenica danter 16 y 20 agn por informé y por baraté fora informaziuns. Tratan i workshop vëgnel fat discusciuns cun d’atri partezipanc y d'atres partezipantes sön les manires y les realtés de vita desvalies, la toleranza, i preiudizi, i clichés y i rodi di sesc.

Por informaziuns y contat: infogay@centaurus.org

Al ê n iade le pröm iade

Le Forum Prevenziun pita por la jonëza dala 3a classa dla scora mesana insö le workshop "C’era una volta la prima volta" por talian sura chisc argomënc: sessualité, sentimënc, corp, dejiders, tëmes, amizizies, raporc, respet, mesi de prevenziun, gravidanza y maraties che pó gní tacades sessualmënter cun n pëis particolar sön (la prevenziun dl) HIV y l'AIDS.

Contat: Giuditta Sereni, Forum Prevenziun, sereni@forum-p.it, Tel. 0471 324801.

Amizizia, amur, sessualité

D’atri workshops vëgn pitá dal zënter de consulënza dla jonëza young+direct: www.young-direct.it/de/young-direct/workshops (Link forest).

Acompagnamënt pedagogich-sessual

L’aiüt por la vita pita por porsones cun desturbs cognitifs acompagnamënt, consulënza y sostëgn por ci che reverda i argomënc pedagogich-sessuai (por mituns y mitans, la jonëza, porsones adultes y ince geniturs). De plü informaziuns ciafëise sön la plata www.lebenshilfe.it/144d705.html (Link forest).

Da lí inant y jí plü sot

  • www.sexualpaedagogik.it (Link forest) La plataforma pedagogia sessuala Südtirol é n’assoziaziun profescionala di pedadogs y dles pedagoghes sessuai cualificá dl Südtirol. Dlungia l’intermediaziun de reladus y reladësses se crüzia la plataforma da renforzé la formaziun sessuala tl Südtirol.
  • www.young-direct.it (Link forest) Sön chësta plata pita le zënter de consulënza y de informaziun por la jonëza danterater les FAQs sön i argomënc „corp/aspet", „amur/amizizia", „sessualité" y „prevenziun", n forum y poscibilités de consulënza online.
  • www.bzga.de (Link forest) Le zënter federal por l’educaziun sanitara (BZgA) pita informaziuns sön düc i argomënc sanitars. Al vëgn dantadöt metü le pëis sön "l’educaziun sessuala". Sön la plata pón ciafé danterater tröc materiai y media dl zënter BZgA, che an pó comané y/o desćiarié, sciöche por ejëmpl la brosciüra „Über den Umgang mit Liebe, Sexualität, Verhütung und Schwangerschaft" y le liber „Aufregende Jahre – Jules Tagebuch".
  • www.gib-aids-keine-chance.de (Link forest) pita implü informaziuns interessantes y atuales por pedagoghes y pedagogs y por le personal insegnant.
  • www.loveline.de (Link forest) é la plata dla jonëza dl zënter BZgA sön l’amur, l’amizizia, le raport, la sessualité y la prevenziun. Chësta plata pita chats, n'enziclopedia dl’amur (cun passa 350 parores), n cufer de argomënc desvalis, novités, argomënc zentrai dl mëis, FAQs y jüc (educatifs).
  • www.lustundfrust.ch (Link forest) L’istitut por la pedagogia sessuala dla cité y dl ciantun de Turic pita dlungia la plata interessanta dla jonëza n setur por personal cualifiché. Chiló pón ciafé danterater reflesciuns sön la prevenziun de suzes dl’AIDS.
  • ww.machsmit.de (Link forest) La plata dla campagna de prevenziun dl’AIDS dl zënter BZgA cun informaziuns, FAQs, jüc por jogn y jones sön chësc argomënt, media y materiai d’educaziun sessuala, sciöche p. ej. La brosciüra „Fliegende Herzen" sön co adoré n presservatif y e-cards da rí (da podëi mené demez online).
  • www.netdoktor.de/sex_partnerschaft (Link forest) Sön chësc portal sanitar ampl pón ciafé informaziuns de crëta y serioses sön l’argomënt dla sessualité; danterater cun n’oferta de quiz educatifs.
  • www.profamilia.de (Link forest) L’uniun ofiziala dla sozieté todëscia por la planificaziun dla familia, pedagogia sessuala y consulënza sessuala pita sön süa plata internet ince na pert detaiada sön i mesi de prevenziun y adöm cun www.sextra.de (Link forest) informatiuns „por la jonëza … por i adulc … por la jënt, che ó savëi deplü" sön le deventé adulc, le corp, l’amur y la sessualité cun lapró la poscibilité de consulënza tres e-mail.
  • www.stradanove.it (Link forest) La plata prinzipala dla cité de Modena pita sot a „sesso & volentieri" les FAQs plü importantes sön chësc argomënt, n glossar „Glossario – le parole del sesso" y „Pocket Sex" cun videos d’educaziun sessuala de trëi menüc sön argomëc desvalis.