Atualità

Sorvisc de emergënza: les iscriziuns é davertes

Termin por dé jö la domanda por le sorvisc de emergënza tl ciamp educatif é incö, 18 de forá dales 24:00. L’iscriziun por le sorvisc de basa por les strotöres por pici mituns resta tres daverta.

Dai 22 ai 28 de forá 2021 é sospendüda l’ativité en presënza dles scolines, dles scores primares, mesanes y altes te döta la provinzia de Balsan. (Foto: Pixabay)

Aladô dl’Ordinanza dl Presidënt dla Provinzia n. 8 dai 17.02.2021 é intratan l’edema dai 22 ai 28 de forá 2021 sospendüda l’ativité en presënza dles scolines, dles scores primares, mesanes y altes te döta la provinzia de Balsan. Ti comuns de Maran, San Pancraz (Val d’Ultim), Rifian o Moos en Passiria vel chësta sospensiun cina ai 7 de merz 2021.

Tles scores elementares y tles scores mesanes y altes gnará porchël adoté la didatica en destanza. Tles scolines y tles scores elementares gnarál metü a jí n sorvisc de emergënza por les families che n’á nia la poscibilité da ciaré sön sü mituns o sües mitans. Al sorvisc á azes i mituns/les mitans de geniturs o de chi che á la responsabilité genitoriala y che é tramidui efetivamënter en servisc dai 22 ai 28 de forá, che n’á nia la poscibilité da ciaré sön sü mituns/ sües mitans tl ambit familiar, o che se ne pó nia se anuzé de modei flessibli de orar de laur o smart working y che laora te chisc seturs: sorvisc essenziai tl setur sanitar; sorvisc soziai y soziosanitars; · tles forzes dl’ordin o tles organisaziuns de pröm aiüt; trasport publich local y sorvisc postal; proteziun zivila; comerz de alimentars o di bëgns de pröma nezescité; apoteches y paraapoteches; personal pedagogich, insegnant, de assistënza por pici mituns/mitans y colaboradú/colaboradëssa al’integraziun che é impegná tl’assistënza pedagogica o la didatica en presënza.

La domanda de amisciun al insegnamënt y al acompagnamënt pedagogich en presënza pó gní presentada, por vigni livel scolastich, ince dai geniturs o responsabli dl’educaziun che é te na situaziun familiara precara y che é acompagná dai Sorvisc soziai, o che á na zertificaziun aladô dla lege 104/1992.

La domanda pó gní desćiariada dala plata internet dles Intendënzes o dala plata www.civis.bz.it o dala plata internet dl’Intendënza ladina. Le medemo vel por les plates internet dl’intendënza todëscia y taliana.

Al ne vá nia debujëgn de injunté al formular la copia de n documënt y gnanca de firmé la domanda en original. Sce la domanda vëgn menada dala misciun e-mail dl genitur/tutor gnará chësc conscidré sciöche na sort de "firma debla".

Geniturs de pici mituns scrij ince ite i mituns pro la strotöra de competënza (cooperative soziala o comun). Por chëstes domandes n’él degun termin por dé jö les domandes. I mituns pó gní scric ite canche an é le debojëgn.

USP/san

Galaria dales fotografies