Atualità

Cuncors “Scrì y vënc – Werni y la storia dla TIERA”

N ch’sta di iel unì stlut ju l cuncors “Scrì y vënc – Werni y la storia dla TIERA”. La premiazion dla trëi tlasses che à venciù unirà fata d’autonn.

Cuncors “Scrì y vënc – Werni y la storia dla TIERA” — Na scumenciadiva dl Ciamp pedagogich dla Direzion provinziela Scolines y scoles ladines

Do che l Ciamp pedagogich ova prejentà d’autonn dl 2019 l liber ilustrà “Werni y la storia dla TIERA“ adum cun n cudejel d’acumpanamënt sun la tematica dl’alimentazion y dla defendura dl tlima iel nasciù l dejidere de dé ora mo n liber ilustrà per sensibilisé i pitli n cont dla scunanza dl ambient.

Sun idea dla culaburadëura dl Ciamp pedagogich Ute Senoner iel unì metù a jì n cuncors per sculeies y sculées dla scoles mesanes ladines y di prim doi ani dla scoles autes. L univa cris na storia per pitli sun la tematica “Refudam – n problem, truepa alternatives”. I tesć pudova vester scric a plajëi per gherdëina, badiot, tudësch o talian. Na lingia de tlasses de Gherdëina y dla Val Badia se à dat ju cun l argumënt y scebën che la forma de nseniamënt se à mudà dassënn da merz inant tres l nseniamënt a destanza iel unì mandà ite truepa stories. De gra al gran mpëni dla nseniantes y di nsenianc y dla sculées y di sculeies ie l cuncors unì stlut ju cun suzes.

Na giuria de cater persones à cris ora la tlasses che à venciù l cuncors cun l aiut dla consulënza dla graficheres de Marameolab, che ova bele fat la bela ilustrazions espressives tl prim liber dla lingia “Werni y la storia dla TIERA”. L ne ie nia stat saurì abiné ora danter la truepa stories nteressantes y tan defrëntes la una dal’autra la miëura.

L vën premià chësta stories:

Prim post: “Die kleinen Helfer der Erde” – Scola mesana Urtijëi, tlas 2B cun la nsenianta Margot Moroder

Segondo post: “Lava nsënia a cialé dla natura” – Scola mesana Urtijëi, tlas 1D cun la nsenianta Laura Ciechi

Terzo post: “Storia de Werni” – Lizeum linguistich La Ila, segonda tlas cun la nsenianta Magdalena Miribung

Pervia dla despusizions de lege per l cuntenimënt dla pandemia Covid-19 à la premiazion ufiziela messù unì spusteda a d’autonn 2020.

La sculées y i sculeies dla tlasses che à arjont i prim trëi posć giapa n bon per cumpré ite tl Kauristore Bulsan, na butëiga de marcanzia ecologich-sustenibla.

I cuntenuc dla storia che à venciù l cuncors unirà elaburei dala culaburadëures dl Ciamp pedagogich per n liber per pitli da 3 a 6 ani y ilustrei dala grupa de grafica Marameolab. Oradechël uniral elaburà n cudejel d’acumpaniamënt cun nfurmazions aprufondides sun la sustenibiltà y sun co che n po fé a produjer manco refudam. L cudejel d’acumpaniamënt ie pensà dantaldut per l personal pedagogich spezialisà y per i genitores.  

La scumenciadiva ie unida tëuta su cun legrëza y nteres da duc chëi che à fat pea. N gran rengraziamënt ti va cundechël a duc chëi che à purtà pro al garaté dl cuncors. Nce tl daunì cialeran de mëter a jì de plu proiec che sustën la culaburazion danter la scoles ladines y l Ciamp pedagogich.

 

USP/ASP

Galaria dales fotografies