Atualità

Scora ladina: Stuflesser é gnü nominé diretur de repartiziun nü

La Junta provinziala á nominé Mathias Stuflesser sciöche diretur dla Repartiziun Aministraziun dla scora y cultura ladina.

Mathias Stuflesser é gnü nominé incö diretur dla Repartiziun Aministraziun dla scora y cultura ladina (Foto:USP)

La Junta provinziala á aprové incö, mertesc ai 7 de aurí, la nomina dl diretur nü dla Repartiziun Aministraziun dla scora y cultura ladina. Ara se trata de Mathias Stuflesser che é atualmënter diretur dl Ofize por la gestiun dl bojëgn IT dla Provinzia. Stuflesser á fat para pro le concurs y é gnü proponü dala Comisciun ala Junta provinziala sciöche candidat por la nomina. “La funziun de diretur de Repartiziun é dër ampla y i sun contënc da avëi ciafé na porsona cualificada che á esperiënza sides tl monn dl'aministraziun publica che ince tl setur cultural”, insciö l'assessur ladin Daniel Alfreider che ti aoda tröp suzes y n bun laur al diretur nü.

Mathias Stuflesser é n linguist y trainer de comunicaziun y á esperiënza tl ciamp dl management de proiec. Al á colauré te proiec de dizionars y terminologia iuridica ladins y á mené sis agn alalungia n‘assoziaziun soziala tl  ciamp dla formaziun. Tl ciamp pedagogich ál organisé dal 2012 inant cursc de formaziun por les scores y les scolines ladines. Dedô á le ladin da Balsan lauré da messé dal 2016 - 2018 tla repartiziun por la cultura taliana. Da ma dl 2018 incá él diretur dl Ofize por la gestiun dl bojëgn IT.

La Repartiziun Aministraziun dla scora y cultura ladina se crüzia da desfiré les prozedöres aministratives dla scora y cultura ladina. Ara desfira por sües unités de organisaziun la surandada de inciaries y i contrac y é responsabla dla legalité di decrec y dles deliberes dla repartiziun, dl’aministraziun dl bilanz, dles tratatives sindacales por le personal insegnant y dl organich. Tl ciamp dla cultura ladina y jonëza se crüziera da garantí i contruibuc por sostigní la cultura ladina y le lingaz ladin. La repartiziun é metüda adöm da dui ofizi: l’Ofize Aministraziun scolastica y  l’Ofize Cultura ladina y Jonëza.

USP/rc/san

Galaria dales fotografies