Atualità

Plura per la mort de Edgar Moroder: "Meric per la scola y la cultura"

Nota da pert dl assessëur per la scola y cultura ladina Daniel Alfreider y dla intendënta Edith Ploner sun la mort dl nseniant y espert de scienzes natureles y dla storia locala.

Cun dulëur y tristëza à l assessëur per la scola y cultura ladina Daniel Alfrieder y l'intendënta Edith Ploner tëut su la nutizia dla mort dl nseniant y per de plu ani vizediretëur dl ITE de Urtijëi Edgar Moroder.

“Edgar Moroder à judà a svilupé inant l sistem scolastich te nosta valedes ladines, ël ie stat na persona de referimënt de gran mpurtanza per nosc studënc y per duta la cumenanza de Gherdëina”, sotrisseia l assessëur Alfreider y l'intendënta Ploner. “L adurvova metodologies de nseniamënt modernes y fova bënulù dai studënc, nsci vëniel lecurdà dala gran pert de si studënc“, dij i respunsabli dla scola ladina. Cun si pascion per la storia, geologia y geografia locala al purtà pro a dé ora de plu publicazions che trata la richëzes cultureles, dla fauna y dla flora de Gherdëina. Ȅl à nsci cuntribuì al stude di antenac y de nosc ncësa, nsci Alfreider y Ploner.

Edgar Moroder ie nce stat per de plu ani vizediretëur dl Istitut Tecnich Raetia, mëmber dl cunsëi dl Museum de Gherdëina dal 1964 al 1972 y per curt tëmp presidënt dla Union di Ladins de Gherdëina.

"La plu sentida cundulianzes da pert dl mond dla scola y dla cultura ladina a duta la familia: ala fëna Waltraud, ala diretëura Monica, ala nsenianta Ivonne, ai parënc y ai cumpnaies de viac", nsci i doi reprejentanc dla Intendënza y Cultura ladina.

USP/USP