Atualità

Iscriziuns y 70 agn de scora paritetica

Iscriziuns tles scolines y scores ladines en aumënt – 70 agn de scora paritetica

I 70 agn dala istituziun dla scora paritetica ladina é stá tl zënter dl De dla Scora ladina organisé incö ai 31 de agost a San Martin de Tor. Cun le decret ministerial nr. 5145/76 dl 27 de agost dl 1948 él gnü reconosciü le model paritetich d’insegnamënt por todësch y talian adöm al adoranza dl ladin sciöche lingaz d’insegnamënt y curicolar, ince sce ma te na picia mosöra. Le model paritetich orô presservé la balanza danter i lingac de insegnamënt talian y todësch, pitan insciö na oportunité da svilupé ince la cultura y le lingaz ladin. Chësta idea se á desmostré sterscia, portan ti ultims setanta agn ala afermaziun de na didatica plurilinguistica unica te süa sort y che á arjunt dër de bogn resultac por ci che reverda la competënza dles scolares y di scolars. Porimpó ne é le mëteman dla scora ladina nia sté saurí y á messü tigní fora les tenjiuns etniches di agn dedô cina ala secunda vera dl monn. I svilups didatics y educatifs á caraterisé la scora ladina de vigni ordin y degré te so tru dai agn cotan movimentá dla istituziun dl 1948 cina aldedaincö, segné da de bones pratiches tla educaziun plurilinguistica integrada, tan che ara vëgn oramai odüda sciöche model de referimënt por les scores dles mendranzes linguistiches. Tl 1975 él gnü istituí l’Intendënza scolastica ladina (spo Departimënt y Scora ladina) y tl 1987 l’Istitut Pedagogich Ladin (spo Inovaziun y Consulënza). Dal 1998 inant él la Facolté de Sciënzes dla Formaziun dla Université de Balsan che pita na formaziun aposta por i insegnanc y les insegnantes ladines.

Scores ladines: Iscriziuns tl ann de scora 2018/19

Tles 15 scores elementares él indöt scrit ite 1145 scolares y scolars por l’ann de scora nü (de chisc 599 tla Val Badia y 546 te Gherdëna), indöt 50 demanco co tl 2017/18. Por ci che reverda les 5 scores mesanes tles valades ladines s’ál registré por l’ann scolastich 2018/19 indöt 843 scolares y scolars, 92 deplü co l’ann passé cun 751 iscriziuns. 531 scolares y scolars frecuentará na scora mesana te Gherdëna y 312 öna dles trëi scores mesanes dla Val Badia. Aumenté é ince le numer di studënc y dles studëntes dles scores altes de La Ila y de Urtijëi cun indöt 534 iscriziuns en confrunt ales 523 dl ann scolastich 2017/18. Le numer plü alt de studënc é cun 221 chël dl’ ITE Raetia, spo 145 tl Lizeum artistich Cademia a Urtijëi, 78 tl ITE y 49 tl lizeum linguistich a La Ila. Da 25 scric ite tl ann passé é le numer dles studëntes y di studënc dla scora profescionala de Urtijëi aumentá a 32 a desmostraziun dla atrativité tl percurs scolastich. Lapró röiel inann 9 studënc dl curs de specialisaziun dl ziplé.

Fajon na cumpëda de düc i liví scolastics röiun a 2522 scolares y scolars scric ite tl ann de scora 2018/19 cun n aumënt complessif de 28 unités dal dat dl ann passé de 2494 scolars y scolares. I dac atuai se referësc al numer dles iscriziuns registrades por l’ann de scora 2018/19 do la contlujiun dla perioda de registraziun da d’aisciöda. Al podess insciö gní a se le dé de piceres mudaziuns.

Tles 17 scolines ladines él scrit ite por l’ann de scolina 2017/18 indöt 722 mitans y mituns en confrunt ai 684 dl 2017/18. Chësc é n aumënt de 38 mituns y mitans. Te Gherdëna él scrit ite 355 (-8 dal 2017/18) mitans y mituns y tla Val Badia 367 (+46 dal 2017/18). Le numer de iscriziuns plü alt é a Urtijëi cun 113 mitans y mituns, spo a Sëlva cun 72 iscriziuns y a Santa Cristina cun 71.

USP