Archif
Archif
Dé dl’Autonomia ai 5 de setëmber: La plata internet y le program é online
Ai 5 de setëmber, Dé dl’Autonomia, vëgnel chësc ann organisè na scomenciadia particolara: la Provinzia mët insciö a jì por chësta ocajiun n Dé dla Porta daverta, tratan chël che düć i interessà po ti dè n’odlada al’aministraziun publica y ales ativitês da vigni dé ti ofizi publics dla Provinzia. La plata internet cun dötes les informaziuns sön le Dé dl’Autonomia é da püch online.
Le Dé dl’Autonomia, ai 5 de setëmber, é n dé storich por le Südtirol. Avisa en chël dé dan da 68 agn, ai 5 de setëmber dl 1946 él gnü sotescrit l’Acordanza de Parigi danter le Pröm Minister dla Talia da laôta, Alcide De Gasperi y le Minister di Afars cun l’Ester dl’Austria da laôta Karl Gruber che à stabilì na sort de Magna Charta por l’Autonomia dl Südtirol. Por recordè chësta acordanza storica vëgnel metü a jì chësc ann na scomenciadia particolara: te indöt 19 sëntes dl’aministraziun provinziala, da Maran, ćina Porsenù, Balsan, Bornech, Neumarkt y Schlanders gnaràl daurì les portes di ofizi y dles sëntes provinziales por na vijita di zitadins: „Cun chësta scomenciadia orunse portè l’aministraziun publica plü daimprò ai zitadins“, dij le Presidënt dla Provinzia Arno Kompatscher.
Por chësta ocajiun él gnü realisè na plata internet aposta: www.provinz.bz.it/autonomietag. Sön la plata internet pon ciafè, por talian y todësch, informaziuns sön l’autonomia, sön süa storia, sön l’amnistraziun publica y – suradöt – sön le Dé dla Porta daverta, organisada ai 5 de setëmber (dales 13 ales 17). Implü pon ciafè na suravijiun dles sëntes davertes ai 5 de setëmber – da Palaz Widmann, ala plaza Silvius Magnago y d’atres önesc sëntes a Balsan, sciöche inće a Maran, Bornech, Porsenù, Neumarkt y Schlanders.
La plata web ofrësc inće na suraodüda sön le program dl dé che prevëiga de plü manifestaziuns de interaziun cun i vijitadus y presentaziuns dles inćiaries politiches (dal Presidënt dla Provinzia ai assessurs) y di sorvisc pità dala Provinzia. Le punt prinzipal d'orientamënt dl dé sarà la plaza Silvius Magnago danter le Palaz Widmann (sënta dl Presidënt dla Provinzia) y le Consëi provinzial.
rc